علوم الحاسب

[شروق جارالله الشمري]

بسم الله الرحمن الرحيم

السلام عليكم ورحمة الله وبركاته
انا مستجدة في الجامعة وما أدبر شي ولا أدري وش السالفة
اتمنى احد يعددلي النقاط المهمة الي يمكن تفيدني
والأشياء الي أحطها في بالي قبل الدراسة وأثناء الدراسة

معليش طولت عليكمo:-)
ومتى أوقات الدوامات؟؟
♡♡

[Chemist.Samar]

وعليكم السلام و رحمة الله وبركاته ,
مبروك القبول ياعزيزتي
الدوام بمدينه الملك عبدالله تحضيري لمدة سنه همن تدرسين التخصص :)
يبدا دوامك من 7 ونص الى 12 ونص او 1 او 1 ونص على حسب جدولكِ
أمشي على نظام الجامعه لا تخالفين عشان تريحين راسك ,
ممنوع الكاميرا - التنوره ماتصير لازقه على جسمك ولا خفيفه ولاهي قصيره - البلايز تحت المرفق

هذا رد لي لواحد :

دقيقه ترى مواد التحضيري سهله اللي عليه الكلام ,
عندك الانجليزي والحاسب والرياضيات بس مو معناته الباقي المواد تهملهن بس
الانقلش هو أكثر واحد راح يأثر عليك بعدين الرياضيات بعدين الحاسب < ذولي المواد ياترفع معدلك يا تخسفه لك

بالنسبه للعب وايام الثانوي ودعهن وقل الله يرحمهن ,
شف انا لي سنيتن بالجامعه قبل جامعة الامام ططبعاً لاني نقلت
الزبده
وش أقولك لك بالجامعه كل واحد نفسي نفسي
لا تنتظر من أحد يساعدك ولا تنظر من أحد يجيك ويعطيك واجباتك + مشاريع من ناحية الطلاب

صحيح فيه طلاب يساعدون وفيه طلاب لآ أنت وحظك يعني
يعني أعتمد على نفسك انسى الضحك واللعب ايام الثانوي ,
حتى المدرسين غير عن الثانوي ,
بالجامعه مايركضون وراك ويقولون فلان وراه ماحليت فلان بسامحك هالمره
فلان وراك غايب فلان بعيد لك الأختبار وووو الخ

انت تسعى لنفسك الاساتذه هنا مايركضون وراك انت تجي لعندهم وتسعى
الواجبات لو ماسلمتها ماراح يقولك ليش ماسلمت ؟
لا مايهمه يشوف جنب اسمك سلمت حط الدرجه وماسلمت حط لك صفر وينحسب عليك
والواجبات لاتصير تنقش من خويك لا . انت حله من نفسك وبأسلوبك عشان يدري انك مجتهد
ومن ناحية التسليم خلك حريص ولا تتأخر عليه مثلاً
لو قالك هذا الواجب تسلمونه خلال هالأسبوع ما تروح تسلمه بأخر الاسبوع خلك بأوله عشان تثبت له انك مجتهد
وعشان يساعدك بالدرجات لو أحتجت ويتغاضى عن اخطائك ,

اللحين نروح للغياب , مو زي الثانوي لو تسحب ع اسبوع كامل محد درى عنك
بالجامعه يختلف كل غياب ينحسب عليك بأشياء 1 - تروح درجاتك 2- غيابك محدود يعني لو غبت ثلاث مرات (مثلاً ) ينزلك حرمان على حسب الساعات للماده
3 - لو غبت يبي يفوت عليك المحاضره وكل محاضره تعتمد على اللي قبله يعني بالمشرمحي تبي تحوس نفسك ولاراح تفهم شي ويفوتك الواجبات ووو الخ
4 - أغلب الأساتذه يشوف إجتهاد الطالب بعدم غيابه 5- لو غبت وكان عليك ( أختبار قصير ) او ( النصفيه والنهائيه ) مافيه إعاده او عذر من ولي الأمر وخلصنا
لا هنا الامور تختلف ,

المشاريع , لكل ماده لها مشروع ووو الخ (سوا بالتحضيري او بالتخصص )
خليك فعّال , وخليك شغلك مضبوط و تابع المشروع مع استاذك وناقشه فيه ( حتى لو نقاش خربطه ) بس اهم شي حسسه انك جاي تدرس ومهتم
انا أذكر بالحاسب مشروعي كنت اجيها واسالها واخذ رايها بشي (سخيف )
بس لازم اخلي مشروعي تحت إشرافها وبشكل مستمر , بحسسها بقيمتها كمشرفه عليه واستاذه الماده =)

نجي للمحاضره نفسها ,
لا تتكلم بالمحاضره وتفلها مع اخوياك , لا إحترم الوقت واحترم المكان واحترم المحاضر
وانت بالمحاضره إكتب معاه الاشياء المهمه + خليك بالصف الاول عشان يتعود على وجهك لانها بتحسب لك هالنقطه بالدرجات

ولمى ترجع للبيت اقرا المحاضره اللي اخذتها بـ نص ساعه قراءه فقط تقل تقرا قصه عادي وباقي وقتك خليه بالماده اللي أنت ضعيف فيها أدرسها كويس
بالخميس والجمعه لخص كل محاضرات الاسبوع بدفتر مرتب زين وذاكره ززززين + الانقلش خليك مكثف عليه لانك ميح فيه ,

الاختبارات عموماً ,
بالنهائي الصراحه أنآ استعد لها قبل بشهر اقسمها واذآكرها
بوقت اسبوعين المراجعه اروح اسأل الاستاذه باشياء ما أفهمها أكون مذاكره بس تكون فيه نقاط غامضه اخليها تشرح من جديد + اي سؤال يخطر ببالي اقولها
بـ ليله الامتحان اصير مستعده له لاني مذاكرتها وتسهل المذاكره

الأهم من هذا
الاحترام والأسلوب يعني لاترد على استاذك
حتى لو استاذك ( حقنه ) و ( ويرفع الضغط ) سسسسلك له عشان تربية اهلك لك وتعطي صوره للناس أنك واحد متربي وترى الاسلوب ترجمه لـ شخصيتك
والله احياناً لو كنت شششاطر ومجتهد بس لسانك طويل تجني على نفسك وتترتب عليه ( رسوب للماده )
هالكلام مو لك والله محشوم بس ودي انبهك عليه , + تعاملك مع الطلاب لا تبخل على أحد بمعلومه لان ماتدري التوفيق يجي من وين
حتى لو كان الطالب مو كفو عادي ترى ساعده كل واحد يتعامل مع الناس بطيب اصله
لاني اذكر لمى كنت أشرح للبنات بحكم اني أشطر وحده بالكلاس في مادة الرياضيات
كنت اشرح لهم ناس يبين بعينهم المعروف وناس لا تهج منك بعد معروفك لهم ( يعني مصلحجيين )
بس عادي انا مساعدتهم لـ وجه الله ابي التوفيق والحمدلله ربي موفقني


+ ذي طريقتي اللي قلت لك على مدى سنتين والحمدلله كان معدلي التراكمي لمده سنتين 4.25

والله يوفقنا يارب بس حبيت أقول اللي عندي لك ولـ غيرك = )

^ لمشيتي على كلامي اللي فوق بالضضضبط
صدقيتي تبي تنجحين بـ تفوق وانتِ مغمممضه =)

أي سؤال أطرحيه محد مقصر معاكِ

[شروق جارالله الشمري]

الله يجزاكم خير